NOVO SITO DEDICA’ A L’INO NASIONALE VENETO!

NUOVO SITO DEDICATO A

L’INNO NAZIONALE VENETO

www.InoNasionaleVeneto.net

Da uncó verxe el sito oficiale de l’INO NASIONALE VENETO.

Se trata de on portale in internet indove catare informasión sora l’Ino Nasionale del Popolo Veneto, ma non solo: se pol trovare anca notìsie de storia veneta e altre curioxità interesanti.
La muxica de l’Ino Nasionale Veneto (cantà pa la prima volta in ocaxión de la 5° Festa dei Veneti a Sitadela/Cittadella (PD) el 07/09/2008) la xe baxà so la “Juditha Triumphans” de Antonio Vivaldi, famoxo conpoxitór veneto, exeguìa pa selebrar la vitoria venesiana a Corfù, co xe stà libarà la ixola da l’asedio sol 1716.
A la mùxica de Vivaldi, riadatà pa èsar mejo cantabile, xe stà studià el testo in lengoa veneta a cura de asociasion culturali venete.
El testo creà el riciama la inportanza de la tradisión che la dà le risorse pa métare in pie on nóvo doman; el conta de i valori tìpici del Popolo Veneto come la voja de fare e el senso de la solidarietà, che tenpo indrìo i xera xà stà riconosésti a i emigranti veneti inte’l mondo. La tera – che inte l’Ino “fiorìse dai monti al mar” – la xe on sìnbolo de na crésita che no la xe solo svilupo industriale e urbàn, ma anca progrèso sociale e anbientale, dato che el Popolo Veneto el gà senpre vivésto fra tera e aqua.
Se trata de on Ino de tuti e par tuti, al de là de qualsiasi divixión o idelogìa politica: l’Ino el nàse da Asociasion Culturali del CAV – Coordinamento Asociasion Venete, comisionà da l’Asociasion “Veneto Nostro – Raixe Venete”.

L’invito che estendémo a tuti i Veneti xe de doprare l’Ino in qualsiasi ocaxión, dai convegni ale partìe sportive, dale riunion ai siti internet, in maniera da far deventàr sto novo projeto on elemento in pì de unión fra tuti i Veneti.

El sito el xe in lengoa veneta e in inglexe; rento se pol catare l’Ino Veneto in versión audio e video (in streaming) e in formato MP3 da scargàr a gratis.

Podemo propio dire che, dopo na Lengoa, na Storia e na Bandiera, finalmente ghemo anca on nostro INO NASIONALE.

Trato da: Raixe Venete