8/9 majo 1997- 8/9 majo 2010
A 13 ani dala liberasion del Campanil de piasa San Marco de Venexia, la Xoventù Independentisa ricorda con onor e gratitudine i patrioti che i fexe la storeca impresa e che i ne ga dado, sepur par poche ore, la libartà perduda.
La serenissima armata, el tanko, el gonfalon isado sul campanil, i carabinieri che prima i manda in coma on sereniximo e i le porta via de peso e dopo i sbrega la nostra bandiera nasional, xe imajini che ne restarà par sempre intel cor.
I Serenissimi ga da esar n’esempio par tuti nialtri xovani che lotemo par la nostra Patria, n’esempio de persone normai che ga deciso, con on atto privo de volensa ma dall’esito incerto, de dimostrar come el Leon marciano no xe morto soto el piè sabaudo giacobin, ma xe vivo e vol tornar a rujir intel l’Europa dei Popoli dove ga sempre fato la parte da protagonista.
On ricordo particolar lo dovemo a Bepin Segato, l’ideologo dei Serenissimi. Xe quelo che nonostante no gabia partecipado in prima persona al’asalto ga fato pi ani de galera e a causa de ciò se ga depirio fin ala morte, in silensio lontan dai rifletori, el 27 Marzo 2006.
Xe lu el primo martire de ancuò par la lotta al’indepedensa Veneta.
Nialtri non ghemo infatti da sercar lontano i nostri miti, i Patrioti ghe li emo visin a casa.

Graxie Ragassi!
W la Veneta Serenissima Armata!
W l’independensa!

Giacomo Mirto
Portavoxe Xoventù Independentista