In primis ringrasio Giacomo Mirto e tuti i toxi che fa parte de Xoventù Independentista par aver riposto la fiducia su de mi lasandome on incarico on mucio importante, quelo de“nuovo rappresentante della gioventù indipendentista” come luri lo definise.
Me presento par quei che no me conose, son Danieli Stefano, studio economia al 5° ano de superiori e son un 18ene vixentin.
No poso negar la felisità de risevare tal ruolo, soratuto in un momento difisile come queo che stemo vivendo, dove la xente non ghe ne poe pi de na italia che xe drio portarne via tuto e che quindi el ruolo dei xovani podaria esar fondamentale par on cambiamento.
Sicuramente, da novo portavose de Xoventù Independentista, al lato pratico, me impegnarò a portar vanti al meio le atività che in sti 4 ani xe deventà on ponto fiso e cioè el campo estivo de lujo, la festa dei avi de otobre e la partecipasion a la importantisima Festa dei Veneti a setembre, momenti magnifeghi indove che se vede toxi che se interesa a quea che xe la so storia, queo che xe el so presente e queo che sarà anca al so futuro da Veneti.
Nei progeti in programa, ghe sarà dele insiative forti sui Serenissimi, persone che rento de naltri ga fato riscoverxare de avere on orgojo e na identità Venetà.
Secondo mi parò far parte de Xoventù, no vol dir solo vendare gadget e far festa, parchè far queo semo boni tuti, ma vol dir sentirse Veneti rento e fora, esendo coscienti de la nostra storia plurimilenaria che ga fato deventar la nostra tera faro de libartà e benesare par secoli, vol dir credare in queo che ne ga tramandà i nostri avi nel tempo, vol dir salvaguardar la nostra tera Veneta contro tuto sto abuso che la xe drio subire, ad esempio con i OGM o tuto sto cemento che sempre pi xe drio portarne via le nostre campagne.
Naltri se impegnemo a difendarla parchè la nostra Tera xe queo che ne resta del pato tra i vivi, i morti e i non ancor nati de la Nasion.
Ringrasiando Giacomo par l’operado ecelente che el ga fato fin deso, e tuti quei che sostiene el grupo, sero co la speransa che sempre pi xente, in ogni parte de qualsiasi teritorio del Veneto el ciape cosciensa de cosa che vol dir esar Veneto, parchè solo così podemo sperar de tornar a esare libari e indipendenti.
W San Marco
Stefano Danieli
Portavose Xoventù Independetista
www.xoventu.org
Loading ...
